Միացեալ Նահանգներու նախագահ Պարաք Օպամա պատմական այցելութեամբ կը գտնուի Քուպա:
«ՌԻԱ Նովոսթի» կը հաղորդէ, որ Օպամա Քուպայի ղեկավարութեան հետ հանդիպումներէ ետք յայտարարած է Ուաշինկթընի եւ Հաւանայի յարաբերութիւններուն մէջ «նոր օր» սկսելու մասին:
Վերջին գրեթէ 90 տարուան ընթացքին Միացեալ Նահանգներու Քուպա այցելած առաջին նախագահը հաւաստած է, որ իր երկիրը փոփոխութիւններ պիտի չպարտադրէ համայնավար երկրին, եւ անոր ճակատագիրը պէտք է որոշեն քուպացիները իրենք: Ան միեւնոյն ժամանակ խոստացած է աւելի ուժեղ կերպով ճնշում գործադրել Քոնկրեսին վրայ, որ վերջինս ջնջէ այն տնտեսական արգելքը, որ սահմանուած էր 1959-ին Քուպայի մէջ տեղի ունեցած յեղափոխութենէն ետք: Օպամա չի կասկածիր, որ շրջափակումը ուշ կամ կանուխ պիտի վերցուի, սակայն թէ ատիկա ե՛րբ տեղի պիտի ունենայ, ան չէ փորձած գուշակել:
Քուպայի նախագահ Ռաուլ Քասթրօ իր կարգին յայտարարած է, որ Հաւանա պատրաստ է երկխօսութիւն կատարելու Ուաշինկթընի հետ, յորդորած է քաղաքակիրթ գոյակցութիւն ապահովել եւ բանավիճիլ Օպամայի հետ այն հարցին շուրջ, թէ ո՛ր երկրին մէջ աւելի յարգուած են մարդկային իրաւունքները:
Իրենց հանդիպումէն ետք մամլոյ ասուլիսի մը ընթացքին երկու պետութիւններու ղեկավարները լաւատես կեցուածքներ արտայայտեցին` նշելով, որ համաձայնած են միասնաբար լուծել Միացեալ Նահանգներու եւ Քուպայի փոխադարձ յարաբերութիւններուն մէջ գոյութիւն ունեցող վիճելի հարցերը: Սակայն անոնք ոչ մէկ փաստաթուղթ ստորագրած են:
(Քաղուած Ազդակ-էն)
All the contents on this site are copyrighted ©. |